சென்னை: தமிழகத்தின் அதிகரித்து வரும் மின் தேவையை சமாளிக்க உடனடியாக 600 துணை மின் நிலையங்கள் தேவைப்படுவதாக மின்துறை அமைச்சர் நிர்மல் குமார் தெரிவித்துள்ளார். மின்வாரிய தலைமை அலுவலகத்தில் முதல்வர் விஜய் ஆய்வு மேற்கொண்டதைத் தொடர்ந்து செய்தியாளர்களிடம் பேசிய அவர், மின் விநியோக கட்டமைப்பை வலுப்படுத்த பல்வேறு நடவடிக்கைகள் மேற்கொள்ளப்பட்டு வருவதாக கூறினார். 

தமிழகம் மட்டுமின்றி நாடு முழுவதும் மின் பற்றாக்குறை நிலவி வருவதாக அமைச்சர் தெரிவித்தார். தமிழகத்தில் துணை மின் நிலையங்களின் பற்றாக்குறை காரணமாக சில பகுதிகளில் மின்விநியோக கட்டமைப்பில் கூடுதல் அழுத்தம் ஏற்படுவதாகவும் அவர் கூறினார்.

மேலும், கூடுதல் அழுத்தத்தை தாங்க முடியாமல் சில இடங்களில் மின்மாற்றிகள் பழுதடைந்து தீப்பற்றும் சம்பவங்கள் ஏற்படுவதாகவும், இதனை சரிசெய்யும் பணிகள் துரிதப்படுத்தப்படும் என்றும் அமைச்சர் தெரிவித்தார். 

மின்வாரியத்தில் 10,000 பணியாளர்கள் நியமிக்கப்பட உள்ளதாகவும் அமைச்சர் நிர்மல் குமார் கூறினார். பழுதடைந்த மின்மாற்றிகளை சீரமைக்கும் பணிகளும் விரைவுபடுத்தப்பட்டு வருவதாக அவர் தெரிவித்தார்.

வரவிருக்கும் கோடை காலத்தில் ஏற்படக்கூடிய அதிகப்படியான மின் தேவையை சமாளிக்கும் வகையில் முன்னெச்சரிக்கை நடவடிக்கைகள் மேற்கொள்ளப்பட்டு வருவதாகவும், காற்றாலை மின் உற்பத்தி குறைவாக இருப்பதும் மின்விநியோகத்தில் தாக்கத்தை ஏற்படுத்துவதாகவும் அமைச்சர் குறிப்பிட்டார். 

தமிழகத்தின் மின்தேவையை பூர்த்தி செய்ய துணை மின் நிலையங்களின் எண்ணிக்கையை அதிகரிப்பது, மின்மாற்றிகளை சீரமைப்பது மற்றும் கூடுதல் பணியாளர்களை நியமிப்பது ஆகியவை முக்கிய நடவடிக்கைகளாக பார்க்கப்படுகின்றன.