சென்னை: பள்ளிக் குழந்தைகளுக்கான பாடப் புத்தகப் பைகளின் சுமை குறைக்கப்படும் என்றும், பாடப் புத்தகங்கள் இனி வண்ணப் படங்கள் நிறைந்த படப் புத்தகங்களாகவும் காட்சி-கேள்விப் பாடங்களாகவும் மாற்றப்படும் என்றும் பள்ளிக் கல்வி, தமிழ் வளர்ச்சி மற்றும் செய்தித்துறை அமைச்சர் ராஜ்மோகன் தெரிவித்துள்ளார்.
உயர்மட்ட ஆலோசனைக் கூட்டம்: தமிழகப் பள்ளிக்கல்விப் பாடத்திட்டங்களை மாற்றியமைப்பது மற்றும் காலத்திற்கு ஏற்ப புதிய பாடங்களைச் சேர்ப்பது குறித்து, அமைச்சர் ராஜ்மோகன் தலைமையில் சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் முக்கிய ஆலோசனைக் கூட்டம் நடைபெற்றது.
இக்கூட்டத்தில் பாடத்திட்ட உயர்மட்ட வல்லுநர் குழு மற்றும் வடிவமைப்பு குழுவைச் சேர்ந்த முக்கிய கல்வியாளர்கள், இஸ்ரோ முன்னாள் இயக்குநர் மயில்சாமி அண்ணாதுரை உள்ளிட்டோர் கலந்து கொண்டனர்.
கூட்டத்திற்குப் பின் அமைச்சர் கூறிய முக்கியத் தகவல்கள்: குறையும் புத்தகப் பை சுமை: பாடப் புத்தகப் பைகளின் சுமை வெகுவாகக் குறைக்கப்படும். பைகளின் சுமை எந்த அளவுக்குக் குறைகிறதோ, அந்த அளவிற்கு மாணவர்களின் மனச்சுமையும் குறையும்.
படப் புத்தகங்களாக மாற்றம்: பாடப் புத்தகங்கள் இனி வெறுமனே எழுத்துக்களாக இல்லாமல், அதிக அளவிலான வண்ணப் படங்கள் நிறைந்த படப் புத்தகங்களாக மாற்றப்படும்.
கதைகள் வழியில் கணிதம்: மாணவர்கள் எளிதாகப் புரிந்து கொள்ளும் வகையில் 'கதை வழி கணிதம்' அறிமுகப்படுத்தப்படும்.
தொழில்நுட்ப பயன்பாடு: பாடப் புத்தகங்களில் உள்ள QR கோடுகளின் எண்ணிக்கை அதிகரிக்கப்பட்டு, ஆடியோ மற்றும் வீடியோ வழியாகவும் பாடம் கற்பிக்கப்படும்.
செயற்கை நுண்ணறிவு (AI): மாணவர்களுக்கு செயற்கை நுண்ணறிவு தொழில்நுட்பத்தின் நுணுக்கங்கள் மற்றும் அதைச் சரியாகப் பயன்படுத்துவதற்கான முறைகள் கற்றுத்தரப்படும்.
பெற்றோரை மதிக்கும் கல்வி: புதிய பாடத்திட்டம் மாணவர்களுக்குப் பெற்றோரைப் புரிந்து கொள்ளவும், அவர்களுக்கு மதிப்பளித்து நடக்கவுமான பண்பாட்டுக் கல்வியையும் கற்பிப்பதாக இருக்கும்.
